Mongwadi: Leonard Pabalelo Malesa

Gore o fihlile mpholo ke bone ka go nyeuma,

Ga mathaka boemathekisi.

Gore o fihlile moleko ke bone,

Ka maisa go pudufala,

Gore o fihlile mpholo ke kwele,

Ka lentšu go ganela teng.

Nnete gore o fihlile ka noši,

Ke bone ka lebala la moratho go swiswala,

Ga go sana le mmalatshehlana masoganeng,

O reng o ba kgethiša diyamaleng nyaope?

Go ja go bona ke ge go kwala swikišana.

Ba gwametše o ba gwameditše o ba hlositše,

Gore o nyarela kae ga go tsebje.

O fihlile ke go robjwa ke maina mpholo.

Tshwane ba re o nyaope.

Mpumalanga ba re o pinch.

Mola kapa bodikela ba go bitša ungan.

Nna ke re o mokotakgopolodiphego.

Ba go leka ga tee o fetoga leaparankwe la bona.

O ba rabadia wa bona melao ba e tšeya go wena.

Wa buša mebele ya bona,

Wa laola menagano ya bona,

Sebelebele wabthopa wa dira ka rati,

Ba tsoga ka wena ba robala ka wena.

A gago maatla nyaope a šiiša nama tša mmele.

O thuthile tša ka mo wa iša ka kua.

O timile mabone a ditoro tša baswa.O lerabele o lenaba boka morekuru,

Gore o nkwe masesane ke bone ka maisa go tlogela phaphuši,

Ba molao e reng ba itlhophile sekgonyana ba sa go kgaleme.

O ratwa kudu Tshwane a mamelodi,

O opile leopo pitoria,

Maisa a go wela bogodimo ka mpa tša mageu.

Wa tšeya bana go batswadi,

Wa ba iša le naga.

Batswadi ba fetoga manaba.O ba direlang se?

Ba go jela dithopaneng o ba tlontlolla pepeneneg.

Goreng mathaka a kgethile wena,

Mabele merera melato yohle a le gona.

Ga o ba tlogele o ba iša bokoto borola hlogo boya matolo.

Ereng o saye le bona legodimong la magana go bowa madumela goya.

Re kwele o jele go lekane, o khoše la mpana palega gomela hle.